|
Aínda que a clave do éxito dos pementos de Herbón é
sen dúbida o seu sabor, o factor sorpresa que temos
en cada un deles converteuse, hoxe por hoxe, noutra
das súas marcas de identidade.
A explicación de porque pican témola na acumulación
que se produce, a medida que madura o froito, dunha
sustancia chamada capsaicina. Entre os motivos que
explican o seu incremento, e polo tanto o feito de
que os pementos piquen, algúns estudos demostraron
que a temperaturas moi elevadas, o estres hídrico
das plantas debido á falta de auga ou prolongar en
exceso a estadía dos froitos na planta son factores
que poden influír, así como outros factores
ambientais e de cultivo.
Á marxe disto, son moitas as persoas que se senten
atraídas por algo que para as pementeiras e os
pementeiros de Herbón é unha tarefa máis do noso
traballo diario: escoller os Pementos.
O feito de que, independentemente da nosa idade,
medrásemos entre pementos explica que, diante dun
cesto, poidamos identificar coa vista, o olor ou o
tacto aqueles que ‘poderían picar’. Tamén sabemos
escoller entre os que pican pouco e moito, pera leva
o seu tempo, e existe unha marxe de erro humano.
O tamaño, o brillo, a intensidade da cor, o tacto, a
morfoloxía... son algúns dos factores nos que
reparamos á hora de desfacernos daqueles pementos
que ‘levantan sospeitas’.
Con todo, non existe unha fórmula exacta e a nosa
marxe de erro, que lóxicamente existe, é a que
converte cada prato, ademais de nun delicioso
bocado, nunha aventura fiel ao noso dito máis
internacional. E iso é o que os fai únicos e
diferentes! ¡ Auténticos !
Tomade nota
Se probas un pemento picante, os líquidos, salvo
o leite, non van aliviar esa sensación, xa que a
capsaicina non é soluble en auga. Os expertos
recomendan pola contra as graxas ou o azucre así
que ... seguide comendo, é a solución máis
axeitada.
E unha curiosidade
Os froitos do xénero capsicum, como é o caso,
conteñen capsaicina. Especúlase que para a
propia planta esta sustancia podería funcionar
como un sistema de defensa contra os insectos ou
algunhas aves.
|
